Vi har ledig eit engasjement ut året som rådgivar/seniorrådgivar - naturforvaltning

Stillinga er plassert i verksemdområdet for berekraftig naturbruk, under seksjon for naturforvaltning. Seksjonen har 10 medarbeidarar. Vi arbeider mellom anna med forvaltning av verneområde og trua og sårbare artar, vern og forvaltning av eksisterande verneområde, viltforvaltning og framande artar. I denne jobben får du høve til å påverke korleis dette blir gjennomført i praksis. Stillinga varer ut 2026.

Arbeidsoppgåver

Som rådgivar/seniorrådgivar for naturforvaltning skal du i hovudsak arbeide med saksbehandling etter mellom anna naturmangfaldlova, vannressursloven og laks- og innlandsfiskelova. Det betyr at du skal arbeide med

saksbehandling og informasjonstiltak
grensejusteringssaker
å følgje opp restaurering og andre naturtiltak
behandling av økonomiske tilskot
oppfølging av vårt arbeid med framande artar
andre prioriterte oppgåver innanfor naturforvaltningsfeltet

Du vil ha utstrekt samarbeid med lokale og regionale styresmakter, organisasjonar og grunneigarar. Du vil då kunne vere i kontakt med folk som har både likt og ulikt syn i saka som Statsforvaltaren.
Det blir noko reising. Andre oppgåver enn dei som er omtalt ovanfor kan og bli tillagt deg.

Kvalifikasjonar

Du har

mastergrad eller tilsvarande innan naturforvaltning, biologi eller utmarksforvaltning
relevant erfaring frå minst ei av arbeidsoppgåvene nemde ovanfor
god kunnskap om terrestrisk økologi
gode skriftlege formuleringsevner
god talforståing
førarkort klasse B

Det er ein fordel at du har

arbeidserfaring frå offentleg forvaltning
kompetanse i GIS

Vi vektlegg personlege eigenskapar spesielt. Mellom anna evner du å

samarbeide og kommunisere godt med andre
arbeide sjølvstendig og målretta
stå i faglige uenigheter og kan handtere desse på ein rolig og løsningsorientert måte

Vi oppmodar nyutdanna som manglar erfaring med arbeidsoppgåvene, men som elles tilfredsstiller kvalifikasjonskrava, om å søkje. Studentar som leverer masteroppgåva no i vår er og aktuelle.

Hos oss får du

ein stabil arbeidsgivar med fleksibel arbeidstid
løn som 1434 rådgivar/ 1364 seniorrådgivar med lønsspenn frå kr.590.000,- til kr.800.000,- . Lønsplassering ut frå kvalifikasjonar, erfaring og lokal lønnspolitikk. I særskilte tilfelle kan høgare lønn vurderast. Stilling som seniorrådgivar har større ansvar og særskilte krav til kompetanse innan fagområdet.
tilsetting etter gjeldande lover, instruksar og reglement. Dei første seks månadene er prøvetid
medlemskap i ei av landets beste pensjonsordningar, Statens pensjonskasse (SPK). Vi trekker 2 prosent av løna di, og i tillegg betaler vi eit innskot til pensjonsordninga di. I SPK får du særs gode pensjons- og forsikringsordningar samt gunstige vilkår for lån til bustad (https://spk.no/Medlemskap-i-SPK)
moglegheit for noko heimekontor når det er føremålsteneleg
høve til å trene i arbeidstida

Les meir om godane ved å jobbe i staten på Arbeidsgiverportalen (https://arbeidsgiver.dfo.no/lonn-goder-og-reise)
Som vår nye kollega vil du få ein utfordrande jobb i eit utviklande og godt fagmiljø
Vi bruker som hovudregel nynorsk som skriftspråk. Den som vert tilsett må beherske norsk både skriftleg og munnleg. Utviklinga av organisasjonen vår er ein kontinuerleg prosess, og den som vert tilsett må vere open for endringar i organisering, oppgåver og ansvarsområde.

Mangfald

Eit godt arbeidsmiljø er prega av mangfald. Vi ønskjer medarbeidarar med ulike kompetansar, fagkombinasjonar, livserfaring og perspektiv for å bidra til ei enda betre oppgåveløysing. Vi oppfordrar difor alle kvalifiserte kandidatar til å søkje utan omsyn til alder, kjønn, funksjonsevne eller etnisk bakgrunn. Du er også velkomen til å søkje sjølv om du ikkje kan vise til ein samanhengande yrkeskarriere. Vi legg til rette for medarbeidarar som har behov for det.

Har du ei funksjonsnedsetting, hol i CV-en eller innvandrarbakgrunn, kan du bli positivt særbehandla om du set kryss for dette når du søkjer stillinga. Du kan lese meir om dette på arbeidsgivarportalen (https://arbeidsgiver.dfo.no/positivsaerbehandling).

Praktisk informasjon om søknadsprosessen

Alle som søkjer stillinga må søkje digitalt. Når søknadsfristen går ut, vurderer vi søknaden din på bakgrunn av informasjonen du har sendt oss. Det er difor viktig at du både i søknadsbrevet og CV-en, viser korleis kompetansen din fyller krava som er satt i utlysinga.

Det er viktig at du registrere all relevant utdanning og erfaring i profilen du opprettar i rekrutteringssystemet (sjølv om du legg ved ein ferdigutfylt CV). Dette er mellom anna nødvendig for å ivareta kravet om fullstendig søkjarliste.

Relevante vitnemål og attester lastar du opp. Vitnemål og/eller karakterutskrifter kan du gjerne hente frå vitnemålsportalen. Har du utdanning frå utlandet, legg du ved godkjenning frå NOKUT/Direktoratet for høyere utdanning og kompetanse. Vedlegg lastar du opp i PDF-format.

Offentleg søkjarliste blir utarbeidd etter søknadsfristens utløp. Om du ønskjer å reservere deg frå den offentlege søkjarlista, må du grunngje dette særskilt. For at vi skal kunne vurdere ønskjet ditt om reservasjon, må du grunngje konkret kva for ulempe det vil ha for deg å stå på den offentlege søkjarlista. Du vil bli varsla om ønsket ditt ikkje vert tatt til følgje. Vi gjer merksam på at søkjarlista kan bli offentleg sjølv om du som søkjar ber om anonymitet jf. offentleglova § 25.

Om oss

Statsforvaltaren er Kongen og Regjeringa sin fremste representant i fylket. Vi har ansvaret for å informere om statleg politikk og sette handlingsplanar ut i livet. Oppgåvene er i hovudsak rettleiing, tilsyn og klagebehandling retta mot enkeltpersonar, kommunar og bedrifter. Dette gjeld innan kommuneøkonomi og forvaltning, sosial- og familierettslege saker, samfunnstryggleik og beredskap, helse, utdanning, landbruk og miljøvern. Vi er ein kompetansearbeidsplass med om lag 150 medarbeidarar som jobbar for visjonen vår «Trygg framtid for folk og natur».
Har du spørsmål om stillinga? Ta gjerne kontakt med rekrutterande leiar Linda Aaram på telefon (Norge +47) 97503185.

Søknadsfrist: 12. april 2026

Rådgivar/seniorrådgivar naturforvaltning