Om stillinga

Er du oppteken av samfunnstryggleik og beredskap? Vi har ledig to faste stillingar på beredskapsseksjonen hos oss, ein med kontorstad Leikanger og ein med kontorstad Bergen.

Statsforvaltaren har ansvar for å samordne arbeidet med samfunnstryggleik og beredskap i fylket, og skal vere ein pådrivar og rettleiar for det. Kontakten med kommunane er sentral, og vi skal særleg rettleie og drive tilsyn med oppfølginga av deira beredskapsplikt. Utviklinga av det lokale og regionale totalforsvaret er og ei viktig oppgåve.

Statsforvaltaren i Vestland har seks avdelingar, og beredskapsseksjonen høyrer til under kommunalavdelinga. Seksjonen har eit breitt spekter av oppgåver, og du vil få ein variert og spennande jobbkvardag hjå oss. Du må rekne med ein del reiseaktivitet, og bør difor ha førarkort.

Arbeidsoppgåver

I stilling vil du mellom anna jobbe med

oppfølging av kommunal beredskapsplikt gjennom rettleiing og tilsyn
analysar av risiko og sårbarheit
utvikling av det lokale og regionale totalforsvaret
planlegging og gjennomføring av øvingar
evaluering av øvingar og reelle hendingar
oppfølging av samfunnstryggleik i kommunal planlegging

Du vil vere ein del av krisestaben til Statsforvaltaren og det kan vere aktuelt å inngå i ei eventuell vaktordning. Andre oppgåver innan samfunnstryggleik og beredskap kan òg vere aktuelle.

Kvalifikasjonar

Vi ser etter deg som

har minimum treårig utdanning frå høgskule/universitet med relevante fag, gjerne innan samfunnstryggleik. I særskilte tilfelle kan lang og relevant praksis kompensere for dette.
har erfaring frå offentleg forvalting, gjerne frå kommunal sektor, og/eller arbeid med samfunnstryggleik og beredskap eller samfunns-/arealplanlegging
kan tryggleiksklarerast
har førarkort klasse B
har god skriftleg og munnleg framstillingsevne på bokmål og nynorsk

Personlege eigenskapar

Vi ønskjer oss ein kollega som

kan formidle komplekse problemstillingar på ein tydeleg og forståeleg måte
kommuniserer godt med kollegaer og eksterne aktørar
arbeider sjølvstendig, målretta og effektivt
er initiativrik, fleksibel og positiv

Som tilsett hos Statsforvaltaren får du

interessante arbeidsoppgåver
eit kompetent og tverrfagleg arbeidsmiljø
ein arbeidsplass i utvikling
medlemskap i Statens pensjonskasse med god pensjonsordning, gunstig bustadlån og forsikringsordning
trening i arbeidstida
delvis heimekontor
fleksibel arbeidstid
løn i samsvar med vår lokale lønspolitikk

Vil du jobbe hos oss? | Statsforvaltaren i Vestland

Kontora våre i Leikanger og Førde ligg i kommunar som er omfatta av den nye ordninga for sletting av studiegjeld. Det vil seie at etter eitt år som yrkesaktiv kan du få sletta 25 000 kroner av studielånet ditt.

Vi ønskjer mangfald

Statsforvaltaren ønskjer mangfald, og vil leggje til rette for eit inkluderande arbeidsliv. Aktuell tilrettelegging kan for eksempel vere tekniske hjelpemiddel, tilpassing av møblar eller endringar av rutinar, arbeidsoppgåver og arbeidstid.

Vi meiner at inkludering og mangfald er ein styrke. Vi ønskjer tilsette med ulik kompetanse, fagkombinasjonar, livserfaring og perspektiv for å bidra til endå betre oppgåveløysing.

Vi oppmodar alle kvalifiserte kandidatar til å søkje utan omsyn til alder, kjønn, nasjonal eller etnisk bakgrunn, funksjonsevne eller hol i CV-en. Vi oppmodar om å krysse av i jobbsøkjarportalen dersom du har nedsett funksjonsevne, hol i CV-en eller innvandrarbakgrunn. Dersom det er kvalifiserte søkjarar frå desse gruppene kallar vi inn minst ein søkjar i kvar av gruppene til intervju.

Vilkår

Alle som søkjer stillinga må søkje digitalt gjennom rekrutteringsportalen Jobbnorge. Du må laste opp relevante vitnemål og attestar. Vitnemål og/eller karakterutskrifter hentar du frå vitnemålsportalen i Jobbnorge. Har du utdanning frå utlandet legg du ved godkjenning frå HK-dir.

Når søknadsfristen er ute, vurderer vi søknaden din på bakgrunn av informasjonen du har sendt oss. Det er derfor viktig at du både i søknadsbrevet og CV-en, viser korleis kompetansen din fyller krava som er sett i utlysinga.

Stillinga er lønna i stillingskode 1434 rådgjevar/1364 seniorrådgjevar, frå kr 560 000–770 000 brutto per år ut frå kvalifikasjonar og lokal lønnspolitikk. Stilling som seniorrådgjevar har strenge krav til kompetanse. For særskilt kvalifiserte søkjarar kan vi vurdere høgare lønn.

Dei første seks månadane er prøvetid. Du kan lese meir om det i statens personalhandbok.

Tenestemålet til embetet er nynorsk.

Offentleg søkjarliste blir utarbeidd etter søknadsfrist. Dersom du ønskjer å reservere deg frå oppføring må du grunngje dette. Du får varsel om reservasjon i rekrutteringsportalen dersom reservasjon ikkje blir teken til følgje.

Rådgjevar/seniorrådgjevar - beredskap